Падрыхтоўка рэзалюцыі па Беларусі і стажыроўкі для моладзі — Ціханоўская правяла сустрэчу ў Бундэстагу

Рэдакцыя Reform.news · 9 лістапада 2026, 20:12

https://reform.news/be/padryhto-ka-rjezaljucyi-pa-belarusi-i-stazhyro-ki-dlja-moladzi-cihano-skaja-pravjala-sustrjechu-bundjestagu/

Святлана Ціханоўская падчас візіту ў Берлін 9 лістапада сустрэлася з кіраўніком дэпутацкай групы «За дэмакратычную Беларусь» у Бундэстагу Кнутам Абрахамам. Бакі абмеркавалі падрыхтоўку новай рэзалюцыі нямецкага парламента па Беларусі, пашырэнне міжпарламенцкага супрацоўніцтва і падтрымку беларусаў у Германіі, паведамляе Офіс Ціханоўскай.

У сустрэчы таксама ўдзельнічалі дарадца па парламенцкім супрацоўніцтве і канстытуцыйнай рэформе Анатоль Лябедзька, галоўны дарадца Франак Вячорка, кіраўнік міжнародных камунікацый Офіса Ціханоўскай Карым Педэрсэн і Ксенія Луцкіна.

Удзельнікі абмеркавалі магчымасць прыняцця абноўленай рэзалюцыі Бундэстага, якая адлюстроўвала б цяперашнюю сітуацыю ў Беларусі, а таксама аднаўленне праграмы стажыровак для беларускай моладзі ў нямецкім парламенце ў 2027 годзе. Раней такую стажыроўку прайшлі чатыры маладыя беларусы. Паводле слоў Лябедзькі, паўтарыць гэтую праграму ў наступным годзе цалкам рэальна.

Акрамя таго, гаворка ішла пра ўдзел нямецкіх дэпутатаў у будучых сустрэчах Альянсу дэпутацкіх груп «За дэмакратычную Беларусь», якія запланаваныя на снежань у Осла і чэрвень у Вільнюсе, а таксама пра стварэнне групы «За дэмакратычную Беларусь» у Парламенцкай асамблеі Савета Еўропы. Кнут Абрахам узначальвае дэлегацыю Бундэстага ў ПАСЕ.

Асобна абмяркоўвалася падрыхтоўка Беларускага тыдня ў Страсбургу ў красавіку 2027 года. У яго рамках чакаецца прыняцце дзвюх рэзалюцый і правядзенне некалькіх мерапрыемстваў, прысвечаных Беларусі.

Таксама ўдзельнікі сустрэчы разгледзелі магчымасць арганізацыі восенню 2027 года Стакгольмскага форуму з удзелам Альянсу дэпутацкіх груп, Офіса Ціханоўскай, парламента Швецыі і ПАСЕ. Мяркуецца, што на форуме абмяркуюць выкананне рэзалюцый, якія плануецца прыняць на красавіцкай сесіі.

Акрамя гэтага, абмяркоўвалася пытанне інтэграцыі беларусаў у Германіі. Лябедзька адзначыў, што Кнут Абрахам і яго калегі адкрытыя да далейшага супрацоўніцтва ў гэтым кірунку.