Беларусь падтрымлівае працаздольнасць ЛЭП з Украінай

Рэдакцыя Reform.news · 2 лістапада 2026, 07:22

https://reform.news/be/belarus-padtrymlivae-pracazdolnasc-ljep-z-ukrainaj/

Беларусь падтрымлівае працаздольнасць лініі электраперадачы, якая ідзе ва Украіну. Хоць яна не эксплуатуецца, уключыць яе могуць у любы момант. Пра гэта СТБ паведаміў намеснік міністра энергетыкі Беларусі Сяргей Адаменка.

“У сакавіку 2022 года лінія электраперадачы Мазыр – Чарнобыльская АЭС была ўключана пад напружанне на тэрмін каля аднаго месяца. Пасля гэтага яна была адключана. У цяперашні час яна знаходзіцца ў адключаным стане, але з беларускага боку працягваецца яе неабходнае тэхнічнае абслугоўванне. Праводзяцца рэгламентныя работы, лінія знаходзіцца ў працаздольным стане. У выпадку неабходнасці яна можа быць уключана пад напружанне ў любы момант. Што тычыцца ўзгодненасці ўключэння, то, вядома, такія аб’екты ўключаюцца па ўзаемным узгадненні з двух бакоў пры наяўнасці ўзгодненых мерапрыемстваў і тэхнічнай магчымасці”, – расказаў ён.

Нагадаем, у лютым 2022 года Расія пачала поўнамаштабнае ўварванне ва Украіну, у тым ліку з тэрыторыі Беларусі. Да гэтага Украіна перыядычна з’яўлялася пакупніком беларускай электраэнергіі. У выніку ўкраінскі бок быў вымушаны паскорыць работы па сінхранізацыі сваёй электрасеткі з еўрапейскай. У сярэдзіне сакавіка 2022 года электрычныя сеткі Украіны і Малдовы былі сінхранізаваныя з сеткамі Еўрасаюза.