У Польшчы апраўдалі вайскоўца, які параніў мігранта на мяжы з Беларуссю

Рэдакцыя Reform.news · 21 кастрычніка 2026, 23:35

https://reform.news/be/u-polshchy-apra-dali-vajsko-ca-jaki-parani-migranta-na-mjazhy-z-belarussju/

Ваенны гарнізонны суд у Варшаве 21 кастрычніка апраўдаў падпаручніка польскай арміі, які ў лістападзе 2023 года параніў мігранта падчас службы на мяжы з Беларуссю. Пра гэта паведаміў віцэ-прэм’ер, міністр нацыянальнай абароны Польшчы Уладзіслаў Касіняк-Камыш.

Паводле слоў міністра, вайскоўцу не даказалі ніякіх парушэнняў пры выкананні абавязкаў. Касіняк-Камыш назваў раненне выпадковым і падкрэсліў, што афіцэру аказалі юрыдычную дапамогу і падтрымку ваеннай групы абароны правоў салдат.

«Вайсковец, які выконвае свае абавязкі, не можа заставацца адзін, нават у цяжкай сітуацыі. Як я ўжо казаў падчас сустрэчы з падпаручнікам, ні адзін вайсковец Войска Польскага не застанецца без дапамогі», — напісаў ён.

Апраўдальны прысуд пакуль не набыў законнай сілы. Як паведамляе Onet, пры разглядзе справы суд улічваў магчымасць самаадвольнага стрэлу пры падзенні вайскоўца.

Што адбылося на мяжы

Інцыдэнт адбыўся ў лістападзе 2023 года каля населенага пункта Тапіла ў Белавежскай пушчы. Вайскоўцы пераследавалі групу людзей, якія перасеклі мяжу з боку Беларусі. Падчас пагоні падпаручнік спатыкнуўся і ўпаў, пасля чаго яго зброя стрэліла. Куля параніла грамадзяніна Сірыі. Вайскоўцы аказалі яму дапамогу.

Афіцэра абвінавачвалі ў неасцярожным абыходжанні са зброяй і ненаўмысным прычыненні цялесных пашкоджанняў. Аднак экспертызы паказалі, што зброя магла стрэліць пры падзенні нават у тым выпадку, калі была правільна пастаўлена на засцерагальнік. Суд палічыў, што неналежнае абыходжанне са зброяй з боку падпаручніка не даказана.

Пракуратура прасіла ўмоўна спыніць справу і прызначыць выплату пацярпеламу ў памеры 2 тысяч злотых. Прадстаўнік параненага сірыйца патрабаваў 50 тысяч злотых. Абарона вайскоўца настойвала на поўным апраўданні.

Справа выклікала палітычную дыскусію

Reform.news пісаў пра гэты працэс у студзені 2026 года. Ужо тады абмяркоўваліся высновы экспертаў пра недахопы зброі і патрабаванне пацярпелага аб кампенсацыі.

Справа стала таксама прадметам спрэчкі пра падтрымку вайскоўцаў, якія нясуць службу на мяжы. У афіцыйнай заяве ад 30 студзеня Мінабароны Польшчы сцвярджала, што непасрэдна пасля здарэння афіцэр не атрымаў дапамогі ад ведамства, якім тады кіраваў Марыюш Блашчак. Паводле версіі міністэрства, падтрымку яму забяспечылі пасля прыходу Касіняка-Камыша. Ведамства таксама заяўляла пра нязгоду міністра з крымінальнымі абвінавачаннямі.