Пакуль рэжым змагаецца з беларускім грамадствам і культурай, задача дэмсіл – захаваць іх – Ціханоўская

Рэдакцыя Reform.news · 14 кастрычніка 2026, 14:18

https://reform.news/be/pakul-rjezhym-zmagaecca-z-belaruskim-gramadstvam-i-kulturaj-zadacha-djemsil-zahavac-ih-cihano-skaja/

Пакуль рэжым змагаецца супраць беларускага грамадства і культуры, задача дэмакратычных сіл – усё гэта захаваць. Пра гэта заявіла Святлана Ціханоўская, выступаючы на мерапрыемстве БДІПЧ АБСЕ, прысвечаным захаванню нацыянальнай і культурнай ідэнтычнасці ва ўмовах аўтарытарызму і ролі моладзі ў беларусізацыі.

«Расія сістэматычна праводзіць палітыку русіфікацыі, асіміляцыі і знішчэння ўсяго нацыянальнага, усяго беларускага. З дапамогай Лукашэнкі яны спрабуюць ператварыць беларусаў у паслухмяных, лаяльных людзей, а ўрэшце — у расіян.

Але я ганаруся, калі бачу, як маладыя людзі ў Беларусі запісваюць TikTok-відэа па-беларуску, ствараюць відэа для YouTube, адкрываюць для сябе беларускую мову і культуру. Гэта дае мне вялікую надзею. Я глыбока перакананая: пакуль рэжым змагаецца супраць беларускага грамадства і культуры, задача дэмакратычных сілаў — усё гэта захаваць», – сказала яна.

Мерапрыемства было арганізавана трыма дзясяткамі краін АБСЕ, якія ўваходзяць у групу сяброў дэмакратычнай Беларусі. Акрамя Ціханоўскай у дыскусіі бралі ўдзел нобелеўскі лаўрэат, праваабаронца Алесь Бяляцкі, кіраўніца моладзевай рады “РАДА” Аляксандра Дойніч, дацэнт ЕГУ Сцяпан Стурэйка. Дыскусію вёў новы спецпасланнік Францыі па Беларусі Мішэль Ру.

Святлана Ціханоўская ў сваім выступленні таксама расказала пра ціск на беларускую культуру і гістарычную памяць. Яна адзначыла, што беларускія ўлады сістэмна абмяжоўваюць нацыянальную культуру і выкарыстоўваюць адукацыю як інструмент ідэалагічнага кантролю.

Ціханоўская звярнула ўвагу на ўзмацненне расійскага ўплыву праз прапаганду, адукацыйныя праграмы. Яна падкрэсліла, што рэкамендацыі па захаванні беларускай мовы і культуры, выкладзеныя ў дакладзе Маскоўскага механізма АБСЕ ў 2023 годзе, дагэтуль не выкананыя.

Яна адзначыла ролю незалежных СМІ, грамадзянскай супольнасці і культурных ініцыятыў у захаванні беларускай культуры і адукацыі за мяжой.