Лукашэнка — Пашыняну: Ты дакладна вызнач, куды твой каньяк забяруць

Рэдакцыя Reform.news · 2 кастрычніка 2026, 15:13

https://reform.news/be/lukashjenka-pashynjanu-ty-dakladna-vyznach-kudy-tvoj-kanjak-zabjaruc/

Аляксандр Лукашэнка падчас сустрэчы з прэм’ер-міністрамі краін ЕАЭС не прамінуў жорстка прайсціся па кіраўніку армянскага ўрада Ніколу Пашыняну. Сам Пашынян не прысутнічаў на сустрэчы. Ён працягвае прытрымлівацца свайго абяцання не ездзіць у Беларусь, пакуль ва ўладзе застаецца Лукашэнка. Пры гэтым армянскі прэм’ер паўдзельнічаў у пасяджэннях Еўразійскага міжурадавага савета па відэасувязі.

Аляксандр Лукашэнка стаў заклікаць краіны ЕАЭС не пакідаць адзіны рынак. У гэтым кантэксце ён і згадаў Арменію.

“Я вас прашу, не спяшайцеся ад гэтага адыходзіць. Нідзе, паверце мне, старому прэзідэнту — 30 гадоў працую: нідзе нас не чакаюць. Ну а потым, вось, па-народнаму кажучы, прыклад вельмі важны — Арменія. Ну калі ты вырашыў у Еўрапейскі саюз, ну куды ты спяшаешся? Ты дакладна вызнач, куды твой каньяк забяруць, куды тваю гародніну, садавіну забяруць. У якім аб’ёме. Ці зможаш ты замясціць тое, што прадаеш сёння ў нас. Калі ты пераканаўся ў тым, што ў цябе Францыя купіць твой каньяк (свой ёй няма куды дзяваць, але ў цябе купіць), добра — ідзі. Чаго ты бяжыш? Чаго ты ставіш воз наперадзе каня?

Таму ну не трэба спяшацца выкідаць тое, што табе сёння дае карысць. Не трэба сыходзіць з гэтага агульнага рынку”, — сказаў Лукашэнка.

Нагадаем, Арменія апошнім часам разглядае магчымасць уступлення ў Еўрасаюз. Вясной на саміце лідары чатырох іншых дзяржаў ЕАЭС звярнуліся да Ерэвана з заклікам правесці рэферэндум наконт Еўрасаюза і ЕАЭС. Прэм’ер-міністр Арменіі Нікол Пашынян адказаў, што пакуль заяўка на ўступленне ў ЕС не пададзеная, правядзенне такога плебісцыту не мае сэнсу.