Эйсмант з сааўтарамі перавыдалі кнігу пра Лукашэнку на англійскай мове

Рэдакцыя Reform.news · 29 ліпеня 2026, 12:58

https://reform.news/be/jejsmant-z-saa-tarami-peravydali-knigu-pra-lukashjenku-na-anglijskaj-move/

Кнігу пра Аляксандра Лукашэнку, выпушчаную ў студзені мінулага года, перавыдалі на англійскай мове. Сёння аўтарскі калектыў у складзе Наталлі Эйсмант, Аляксандра Радзькова, Уладзіміра Пярцова і Аляксандра Карлюкевіча прадставіў яе на штогадовым семінары кіраўнікоў дыпламатычных прадстаўніцтваў і консульскіх устаноў.

Як паведамляе БелТА, прэзентацыя кнігі стала цэнтральным мерапрыемствам семінара. Яе наклад складае 2 тыс. асобнікаў.

Міністр замежных спраў Максім Рыжанкоў заявіў, што да выдання была вялікая цікавасць “на знешнім контуры”, таму выпуск англамоўнай версіі з’яўляецца заканамерным.

У кастрычніку мінулага года “Бюро” прааналізавала, хто ж купляе кнігу. Высветлілася, што за дзесяць месяцаў 2025 года дзяржустановы Беларусі закупілі больш за 1,3 тысячы асобнікаў кнігі. На гэта з бюджэту было выдаткавана каля 260 тысяч рублёў.

Верагодна, цяпер кніга будзе масава закупляцца замежнымі ўстановамі.