Беларусь ратыфікавала пагадненне аб абароне сакрэтнай інфармацыі з Інданезіяй

Рэдакцыя Reform.news · 18 чэрвеня 2026, 19:25

https://reform.news/be/belarus-ratyfikavala-pagadnenne-ab-abarone-sakrjetnaj-infarmacyi-z-indanezijaj/

Аляксандр Лукашэнка падпісаў законы аб ратыфікацыі трох міжнародных дагавораў, паведамляе яго прэс-служба.

Беларусь і М’янма ратыфікавалі міжурадавае пагадненне аб супрацоўніцтве і ўзаемнай дапамозе ў мытных справах. Дакумент вызначае парадак узаемадзеяння мытных органаў дзвюх краін з мэтай выяўлення, спынення і расследавання мытных правапарушэнняў.

З Інданезіяй ратыфікавана пагадненне аб узаемнай абароне сакрэтнай інфармацыі. Дагавор устанаўлівае парадак абыходжання з такімі звесткамі, меры іх абароны і кампетэнтныя органы, адказныя за выкананне пагаднення.

Таксама ратыфікаваны пратакол аб унясенні змяненняў у пагадненне аб парадку фарміравання і выканання бюджэту Шанхайскай арганізацыі супрацоўніцтва. Дакумент замацоўвае магчымасць выплаты ўзносаў у бюджэт ШАС не толькі ў доларах ЗША, але і ў іншых валютах.