СБУ затрымала завуча, якая карэктавала расійскія ўдары па Краматорску. Яе завербавалі падчас паездкі ў Беларусь

Рэдакцыя Reform.news · 15 красавіка 2026, 15:46

https://reform.news/be/sbu-zatrymala-zavucha-jakaja-karjektavala-rasijskija-dary-pa-kramatorsku-jae-zaverbavali-padchas-paezdki-belarus/

Служба бяспекі Украіны затрымала інфарматара расійскай ФСБ, якая карэктавала расійскія ракетна-дронавыя ўдары па Краматорску. Жанчына працавала завучам у адной са школ Краматорска.

ФСБ звярнула ўвагу на завуча падчас яе паездкі ў Беларусь на пачатку поўнамаштабнай вайны. Супрацоўніцтва было актывавана летам 2025 года.

Жанчыне даручылі адсочваць лакацыі ВСУ ў Краматорску. Для гэтага яна гуляла па горадзе і фіксавала найбольшае засяроджанне ўкраінскіх вайскоўцаў і тэхнікі.

Таксама завуч спрабавала завуалявана даведвацца разведвальную інфармацыю ў сваіх знаёмых падчас побытавых размоў. Атрыманую інфармацыю яна перадавала расійскаму куратару праз мэсэнджар.

Супрацоўнікі СБУ затрымалі жанчыну па месцы жыхарства. Ёй прад’яўлена абвінавачанне ў дзяржаўнай здрадзе ва ўмовах ваеннага становішча.