Расійскі амбудсмен падзякавала Лукашэнку за абмены на беларускай тэрыторыі

Рэдакцыя Reform.news · 11 красавіка 2026, 15:30

https://reform.news/be/rasijski-ambudsmen-padzjakavala-lukashjenku-za-abmeny-na-belaruskaj-tjerytoryi/

Расійскі ўпаўнаважаны па правах чалавека Таццяна Маскалькова падзякавала Аляксандру Лукашэнку за магчымасць праводзіць абмены ваеннапалоннымі на беларускай тэрыторыі паблізу ўкраінскай мяжы.

Пра гэта яна заявіла ў суботу падчас 72-га абмену ў фармаце 175 на 175, піша Sputnik Беларусь. У яго межах таксама былі 7 мірных жыхароў Украіны і 7 — Курскай вобласці РФ.

«Цяжка знайсці словы, каб выказаць вялізную падзяку і прэзідэнту Беларусі Аляксандру Рыгоравічу Лукашэнку, і тым людзям, якія разам з намі сустракаюць і ваеннапалонных, і грамадзянскіх», — сказала яна.

Паводле яе сцвярджэння, атмасфера, створаная на беларускай тэрыторыі, дазваляе дамаўляцца з украінскім бокам і аказваць неабходную дапамогу людзям адразу пасля перасячэння мяжы.

«Людзям патрэбна і хуткая дапамога, і лекавыя сродкі. Хтосьці адразу ж хацеў бы звязацца са сваімі роднымі людзьмі», — сказала Маскалькова.