На двух мінчан і замежніка завялі справу за арганізацыю незаконнай міграцыі

Рэдакцыя Reform.news · 20 сакавіка 2026, 11:56

https://reform.news/be/na-dvuh-minchan-i-zamezhnika-zavjali-spravu-za-arganizacyju-nezakonnaj-migracyi/

Прэс-служба МУС паведаміла пра затрыманне двух мінчан і аднаго замежнага грамадзяніна па падазрэнні ў арганізацыі незаконнай міграцыі.

Паводле версіі міліцыі, яны арганізавалі незаконнае знаходжанне ў Беларусі 11 прадстаўнікоў краін Паўднёвай Азіі.

“46-гадовыя дырэктар і менеджар фірмы па арэндзе кватэр у сталіцы прадастаўлялі жыллё нелегалам па кошце ў 4–5 разоў вышэйшым за рынкавы. Асцерагаючыся прыцягнення да крымінальнай адказнасці, пасля атрымання грошай за свае паслугі фігуранты прымушалі кліентаў пакінуць кватэры пад пагрозай праверкі праваахоўнікамі або ж знаходзілі іншую ўяўную падставу для іх выселення. Аплату не вярталі”, — гаворыцца ў паведамленні.

Знаходзіць кліентаў дапамагаў 51-гадовы грамадзянін адной з краін Паўднёва-Азіяцкага рэгіёна.

Паведамляецца, што замежнікі, якія карысталіся паслугамі затрыманых, таксама працавалі незаконна.

Арыштаваны чатыры кватэры, рахункі і аўтамабіль. Мігранты дэпартаваныя.