Тры залёты расійскіх дронаў у Беларусь зафіксавана ў лютым

Рэдакцыя Reform.news · 11 лютага 2026, 14:09

https://reform.news/be/try-zaljoty-rasijskih-drona-u-belarus-zafiksavana-ljutym/

З пачатку лютага зафіксавана тры выпадкі залёту расійскіх беспілотнікаў у паветраную прастору Беларусі, паведамляе «Флагшток» са спасылкай на ўкраінскія маніторынгавыя каналы.

5 лютага ў Беларусь у 12:07 заляцела «пара беспілотнікаў», паведамляў тэлеграм-канал «еРадар» з меркаваннем, што дроны паляцяць уздоўж мяжы на Кіеўскую або Жытомірскую вобласць. Пра гэтыя дроны больш не паведамлялася.

6 лютага адзін беспілотнік ляцеў з Беларусі на Оўруч у 03:01. 7 лютага адзін дрон вылецеў у Гомельскую вобласць праз Чарнобыль у 06:49. У 07:13 было зафіксавана, што адзін беспілотнік ляціць з Беларусі на Чарнобыль. Верагодна, гаворка ішла пра адзін і той жа дрон.

Такім чынам, з пачатку лютага расійскія дроны заляталі ў Беларусь 3 разы. У студзені такіх выпадкаў было зафіксавана 8.