Ціханоўская пра ўдар па Кіеве: Гэта і ёсць уяўленне Расіі пра «мір»

Рэдакцыя Reform.news · 27 снежня 2025, 17:52

https://reform.news/be/cihano-skaja-pra-dar-pa-kieve-gjeta-i-josc-uja-lenne-rasii-pra-mir/

Кіраўніца Аб’яднанага пераходнага кабінета Святлана Ціханоўская асудзіла ўдар па Кіеве, які Расія нанесла напярэдадні сустрэчы Уладзіміра Зяленскага і Дональда Трампа.

«Кіеў падвяргаецца масіраванай расійскай атацы. Дроны і ракеты паражаюць жылыя дамы і энергетычную інфраструктуру. Сем’і застаюцца без ацяплення і электрычнасці. Гэта і ёсць уяўленне Расіі пра “мір” — тэрорам супраць мірных жыхароў. Ёсць толькі адзін адказ: рашучая падтрымка абароны Украіны», — напісала лідарка дэмсіл у X.

Нагадаем, у ноч на 26 снежня Расія атакавала Украіну больш чым 40 ракетамі і 519 ударнымі дронамі. Украінскім сілам СПА ўдалося збіць 503 варожыя цэлі. Асноўнай мішэнню сталі Кіеў і Кіеўская вобласць. Ва ўкраінскай сталіцы пацярпелі 7 раёнаў, адзін чалавек загінуў, дзясяткі атрымалі раненні і траўмы, сярод пацярпелых — двое дзяцей.