Фото: sudexpert.gov.by
У Краснаполлі 39-гадовы мужчына памёр у выніку атручэння грыбамі. У яго арганізме выявілі таксіны, якія ўтрымліваюцца ў некалькіх відах смяротна атрутных грыбоў, паведамляе ўпраўленне Дзяржаўнага камітэта судовых экспертыз па Магілёўскай вобласці.
Мужчына самастойна сабраў грыбы ў лесе і прыгатаваў іх на абед. Ужо ўвечары яго стан рэзка пагоршыўся: з’явіліся болі ў жываце, млоснасць, ваніты, дыярэя і агульная слабасць.
Брыгада хуткай дапамогі даставіла пацярпелага ў цэнтральную раённую бальніцу. Пазней яго перавялі ў Магілёўскую клінічную бальніцу, аднак выратаваць мужчыну не ўдалося. Ён памёр на сёмы дзень пасля ўжывання грыбоў.
Для ўстанаўлення дакладнай прычыны смерці спецыялісты правялі судова-медыцынскую экспертызу, вывучылі медыцынскія дакументы і вынікі даследавання Нацыянальнай антыдопінгавай лабараторыі.
У біялагічным матэрыяле памерлага выявілі α-аманіцін і β-аманіцін — надзвычай небяспечныя таксіны, якія ўтрымліваюцца ў бледнай і белай паганках, галерыне аблямаванай і некаторых разнавіднасцях лепіётаў — невялікіх грыбоў-парасонаў.
З улікам клінічнай карціны, вынікаў даследаванняў, змяненняў унутраных органаў і абставінаў здарэння эксперты прыйшлі да высновы, што мужчына памёр ад вострага пероральнага атручэння, ускладненага сіндромам паліорганнай недастатковасці.
У ДКСЭ папярэдзілі, што атручэнні грыбамі ўяўляюць сур’ёзную небяспеку. Паводле даных ведамства, 80–90% выпадкаў ужывання бледнай паганкі заканчваюцца смерцю. Атруціцца таксама можна ядомымі, але нясвежымі грыбамі.
Пры з’яўленні першых сімптомаў інтаксікацыі неабходна неадкладна звяртацца па медыцынскую дапамогу. Самастойна справіцца з такім атручэннем немагчыма.
Спецыялісты рэкамендуюць збіраць толькі добра вядомыя грыбы, правяраць грыбы, прынесеныя сваякамі, і выкідваць пераспелыя, чарвівыя або сапсаваныя асобнікі. Перапрацаваць сабраныя грыбы варта на працягу сутак, а для нарыхтоўкі выкарыстоўваць толькі маладыя.
Перад прыгатаваннем грыбы неабходна старанна ачысціць і прамыць. Нельга ўжываць марынаваныя грыбы з бляшанак з уздутымі накрыўкамі. Захоўваць грыбы варта ў прахалодным месцы.